उत्तर लखिमपुर, असम,nelive24:
असमका गोर्खा जातिका लागि महत्त्वपूर्ण घटनाक्रमका रूपमा भारतीय गोर्खा परिसंघ (भा.गो.प.), असम राज्य समितिको साधारण सभा आइतबार उत्तर लखिमपुरको चराइमोरियास्थित राजधनी इटरी प्रेक्षागृहमा सम्पन्न भएको छ। यसै अवसरमा भारतीय गोर्खा परिसंघ, लखिमपुर जिल्ला समितिको प्रतिनिधि अधिवेशनले पुरानो समितिलाई विधिवत विघटन गर्दै जिल्ला समितिको पुनर्गठन सर्वसम्मत रूपमा सम्पन्न गरेको छ।
जिल्ला अध्यक्ष श्री गोबिन विश्वकर्माको अध्यक्षतामा सम्पन्न प्रतिनिधि अधिवेशनले रंगनादी क्षेत्रका अवकाशप्राप्त कर्मचारी श्री राजेन छेत्रीलाई लखिमपुर जिल्ला समितिको अध्यक्षमा निर्वाचित गरेको छ। त्यसैगरी, रामपुर क्षेत्रका भारतीय सेनाबाट अवकाशप्राप्त सुबेदार मेजर गोपाल लिम्बूलाई कार्यकारी अध्यक्ष तथा लखिमपुर क्षेत्रका अवकाशप्राप्त शिक्षक श्री हेमचन्द्र छेत्रीलाई मूल सचिवको जिम्मेवारी प्रदान गरिएको छ। परिसंघका केन्द्रीय तथा राज्य नेतृत्व र विभिन्न सामाजिक संस्थाका प्रतिनिधिहरूको उपस्थितिमा गठन भएको यो ३७ सदस्यीय नवगठित समितिलाई सम्पूर्ण लखिमपुर जिल्लाभरि परिसंघको संगठनात्मक आधार सुदृढ बनाउने र जातीय गतिविधिहरू समन्वय गर्ने जिम्मेवारी दिइएको छ।
यसैबीच, आगामी २५ अगस्ट २०२६ मा लखिमपुरमा आयोजना गरिने भारतीय गोर्खा परिसंघ, असम राज्य समितिको ७औँ त्रैवार्षिक अधिवेशन तथा आजाद हिन्द फौजका अमर शहीद मेजर दुर्गा मल्लको ८२औँ बलिदान दिवसलाई भव्यताका साथ सम्पन्न गर्न छुट्टै साधारण सभामार्फत एक सशक्त स्वागतकारिणी समिति गठन गरिएको छ। उक्त सभा अखिल असम गोर्खा छात्र संघ (AAGSU), असम गोर्खा सम्मेलन (AGS), असम नेपाली साहित्य सभा (ANSS) र गोर्खा स्वायत्त परिषद् माग समिति (GACDC) लगायतका प्रतिनिधिहरूको गरिमामय उपस्थितिमा सम्पन्न भएको थियो।
असम नेपाली साहित्य सभा, लखिमपुरका अध्यक्ष श्री डिल्लीराम शर्माको अध्यक्षतामा बसेको बैठकले वकिल तथा विशिष्ट व्यवसायी किशोर कार्कीलाई स्वागतकारिणी समितिको अध्यक्ष र श्री राजेन छेत्रीलाई कार्यकारी अध्यक्षमा सर्वसम्मत चयन गरेको छ। समितिको वरिष्ठ उपाध्यक्षमा श्री प्रेम सुबेदी, उपाध्यक्षमा श्री गोपाल लिम्बू, मुख्य मूलसचिवमा श्री डिल्लीराम शर्मा, मूलसचिव (समन्वय) मा श्री हेमचन्द्र छेत्री तथा मूलसचिव (प्रशासन) मा श्री मनोज छेत्रीलाई जिम्मेवारी प्रदान गरिएको छ। गोर्खा नागरिक समाजको व्यापक प्रतिनिधित्व सुनिश्चित गर्न असम गोर्खा सम्मेलनका दिलीप छेत्री, अखिल असम गोर्खा छात्र संघका युवराज कटुवाल, असम नेपाली साहित्य सभाका धर्मेन्द्र उपाध्याय लगायतलाई उपाध्यक्षमा तथा माधव नेपाल, राज पराजुली र पंकज मगरलाई मूलसचिवमा मनोनयन गरिएको छ।
कार्यक्रमलाई सम्बोधन गर्दै भारतीय गोर्खा परिसंघ, असम राज्य समितिका मूल सचिव श्री नन्द किराती देवानले प्रथम गोर्खा शहीद मेजर दुर्गा मल्लको देशभक्ति र त्यागले नयाँ पुस्तालाई प्रेरित गरिरहने बताए। उनले त्रैवार्षिक अधिवेशनलाई संगठनको गतिविधिको समीक्षा गर्ने र असमका गोर्खा समुदायका सवालहरूबारे भावी रणनीति तय गर्ने लोकतान्त्रिक मञ्चका रूपमा व्याख्या गरे। सभामा राज्य समितिका अध्यक्ष अमर अधिकारी, कार्यकारी अध्यक्ष ठण्डी नेवार, वरिष्ठ उपाध्यक्ष खेम प्रधान लगायत थुप्रै केन्द्रीय तथा जिल्ला तहका पदाधिकारीहरूको उपस्थिति रहेको थियो।
परिसंघका वरिष्ठ उपाध्यक्ष श्री खेम प्रधानले पत्रकारहरूसँग कुरा गर्दै २४ अगस्ट २०२६ मा बिहानैबाट अधिवेशन सुरु भई बेलुका प्रतिनिधि सभा आयोजना गरेर नयाँ राज्य समिति गठन गरिने जानकारी दिए। उनका अनुसार २५ अगस्टका दिन राज्यस्तरीय रूपमा मेजर दुर्गा मल्लको बलिदान दिवस श्रद्धापूर्वक मनाइनेछ। यी दुवै कार्यक्रम असमका गोर्खाहरूका लागि ऐतिहासिक समागम बन्ने र यसले साङ्गठनिक एकतालाई सुदृढ पार्दै राष्ट्रिय वीरहरूको सम्मान र सामाजिक तथा संवैधानिक अधिकारहरूको संरक्षणका लागि सामूहिक प्रतिबद्धता स्थापित गर्ने विश्वास लिइएको छ।