Nelive24/जुलाई ५, २०२६ :नेपाली साहित्य जगत्का सुपरिचित व्यक्तित्व, वरिष्ठ साहित्यकार, समालोचक, तथा इन्द्रेनी प्रकाशन (असम) का प्रतिष्ठापक आदरणीय रुद्र बराललाई यस वर्षको प्रतिष्ठित “भाइचन्द स्मृति पुरस्कार–२०२६” प्रदान गरिने घोषणा भएको छ। नेपाली साहित्य अध्ययन समिति, कालिम्पोङद्वारा उहाँको तेस्रो उत्कृष्ट काव्यकृति ‘थोपो र मरुभूमि’ (२०२३) का लागि यो पुरस्कार प्रदान गर्न लागिएको हो। यस गौरवमय घोषणाले सम्पूर्ण असमेली नेपाली साहित्य जगत् र इन्द्रेनी परिवारमा खुसीको लहर छाएको छ।
आगामी १३ जुलाई २०२६ का दिन आदिकवि भानुभक्त आचार्यको २१२औँ जन्मजयन्तीको पावन अवसरमा कालिम्पोङको ऐतिहासिक रामकृष्ण रङ्गमञ्च (टाउन हल) मा आयोजना हुने भव्य समारोहमा उहाँलाई यस पुरस्कारबाट सम्मानित गरिनेछ। उक्त समारोहमा साहित्यकार बराललाई रजत स्मृति चिह्न, दोसल्ला, प्रशस्ति पत्र र नगद पुरस्कारसहित सम्मान गरिने कार्यक्रम तय भएको छ।
असमको शोणितपुर जिल्लाअन्तर्गत बडसोला निवासी, पेसाले शिक्षक र स्वभावले अत्यन्तै आत्मीय साहित्य साधक रुद्र बरालको नाम असमेली नेपाली साहित्यमा एउटा बलियो संस्था जस्तै स्थापित छ। उहाँ असम नेपाली साहित्य सभाको पूर्व महासचिवसमेत रहिसक्नुभएको छ। विशेष गरी कोरोनाकाल (२०१९-२०) को कठिन समयमा संस्थाको मूल सचिवका रूपमा र आफ्नै कृति ‘तेस्रो आँखो’ मार्फत उहाँले असममा साहित्यिक जागरण एवम् कविता लेखन क्षेत्रमा नयाँ लहर ल्याउनुभएको थियो।
‘इन्द्रेनी प्रकाशन’ को स्थापना गरेर उहाँले असमका कुना-काप्चामा लुकेका नवीन र जोसिला युवा सर्जकहरूलाई खोज्ने, उनीहरूलाई अनलाइन-अफलाइन मञ्च दिने र उनीहरूका रचनाहरूलाई पुस्तकका रूपमा बजारमा ल्याएर स्थापित गराउने ऐतिहासिक कार्य गर्नुभएको छ। उहाँको यसै प्रयासका कारण आज असममा युवा कविहरूको एउटा सिङ्गो र सशक्त पुस्ता नै तयार भएको छ। युवा वर्गलाई साहित्य लेखनमा लत बसाल्न र उनीहरूलाई जोस-जाँगरका साथ अघि बढाउन उहाँ सधैँ इन्द्रेनीको ‘मूल खाँबो’ बनेर उभिनुभएको छ।
कवि बरालका कविताहरू समाज रूपान्तरणका प्रखर स्रोत मानिन्छन्। जातीय हक-अधिकार, समाजको तल्लो वर्गको मुक्ति, नारी अस्मिताको रक्षा र पर्यावरण संरक्षण जस्ता गहन विषयहरू उहाँको काव्यचेतनाका मेरुदण्ड हुन्। जटिल मानवीय भावनाहरूलाई थोरै शब्दमा, बिम्बात्मक र उत्कृष्ट व्यङ्ग्यको सहारा लिएर प्रस्तुत गर्न सक्ने उहाँको अद्भूत क्षमताको आज कालिम्पोङको ऐतिहासिक मञ्चमा सही र न्यायोचित मूल्याङ्कन भएको छ। उहाँको यो ऐतिहासिक उचाइ सम्पूर्ण साहित्य प्रेमी र उहाँको मार्गदर्शनमा हुर्किएका हजारौँ युवा सर्जकहरूका लागि ठुलो उत्सव र गौरवको क्षण हो। उहाँको शक्तिशाली कलम र अभिभावकत्वले आगामी दिनहरूमा पनि समाजलाई ब्युँझाउने र नयाँ पुस्ता जन्माउने कार्य निरन्तर चलिरहोस् भनी सम्पूर्ण साहित्यप्रेमीहरूले शुभकामना व्यक्त गरेका छन्।
Wedding · Cinematic · Album
Kaanchi Multimedia
We capture your happiness, frame by frame.